ქუთაისის აეროპორტი შესაძლოა, “ანაკლია სითის” სატვირთო გადაზიდვებისთვისაც იყოს გამოყენებული”- ამის შესახებ “საქართველოს აეროპორტების გაერთიანების” ხელმძღვანელმა ქეთი ალექსიძემ გადაცემაში “საქმის კურსი” განაცხადა.

ალექსიძის თქმით, “ანაკლია სითის” პროექტის განხორციელების შემთხვევაში, ქუთაისის აეროპორტის არა მარტო სამგზავროდ, არამედ სატვირთო მიმართულებით გამოყენებაც შეიძლება, რასაც ინფრასტრუქტურული ცვლილებების განხორციელება დასჭირდება.

„ქუთაისის აეროპორტი თავისი გეოგრაფიული მდებარეობით საკმაოდ მიმზიდველია. ის არის საქართველოს ცენტრში, რაც გულისხმობს იმას, რომ ქუთაისიდან ნებისმიერ წერტილში გადაადგილება სულ რამდენიმე საათში ხელმისაწვდომია. აქედან გამომდინარე, ამ პროექტის განხორციელების შემთხვევაში, ქუთაისის აეროპორტის სამგზავროდ გამოყენება შეიძლება. ხოლო სატვირთო მიმართულების შემთხვევაში, აღნიშნულ აეროპორტში რიგი ინფრასტრუქტურული ცვლილებები იქნება განსახორციელებელი”, – განაცხადა ალექსიძემ.

მისივე თქმით, ქუთაისის აეროპორტს პერსპექტივა აქვს და სამომავლოდ, შესაძლოა, მსხვილი გადამზიდავებისთვის ლოჯისტიკურ ცენტრად იქცეს.

„ქუთაისის აეროპორტს პერსპექტივა აქვს. მისი უპირველესი დანიშნულება არის დაბალბიუჯეტიანი ავიაკომპანიებისთვის გათვალისწინებული აეროპორტი, თუმცა ჩვენ ვმუშაობთ „კარგო” გადამზიდავებთან, რათა შევაფასოთ პოტენციალი, რომელიც შეიძლება ჰქონდეს აეროპორტს იმისთვის, რომ მომავალში „კარგო” გადაზიდვებისთვისაც მოხდეს მისი გამოყენება და გახდეს ლოჯისტიკური ცენტრი და სორტირების ბაზა მსხვილი გადამზიდავებისთვის”, – აღნიშნა ალექსიძემ.

ამასთან, როგორც ალექსიძემ “საქმის კურსს” განუცხადა, მგზავრთა ნაკადი მთელი ქვეყნის მასშტაბით 49%-ით არის გაზრდილი. ქუთაისის აეროპორტში კი მგზავრთა ნაკადის ყველაზე დიდი ზრდა – 93% დაფიქსირდა.

ანაკლიაში ღრმაწყლოვანი პორტის მშენებლობასა და განვითარებასთან ერთად ქალაქ ანაკლიის პროექტის განვითარება იწყება. ქალაქ ანაკლიას კომპანია “ანაკლია სითი” განავითარებს, რომლის თანადამფუძნებლები „თიბისი ჰოლდინგი” და “კონტი ჯგუფი” არიან. იმავე კომპანიებმა დააფუძნეს “ანაკლიის განვითარების კონსორციუმი” და ანაკლიაში ღრმაწყლოვან პორტის მშენებლობისა და განვითარების პროექტს ახორციელებენ.

შეიძინეთ ყველაზე იაფი ავიაბილეთი

დაჯავშნეთ იაფი სასტუმრო